लायन्स क्लब ऑफ देहूरोडचा पदग्रहण सोहळा संपन्न; अध्यक्षपदी राजाराम अस्वरे, सचिवपदी व्यंकट चेलापथी तर खजिनदारपदी नरेंद्र महाजनी यांची निवड
पुणे खबर दि.१५ जून २०२६
देहूरोड: लायन्स क्लब ऑफ देहूरोडचा वार्षिक पदग्रहण सोहळा नुकताच लायन्स क्लब कॉलेज येथे उत्साहात पार पडला. आगामी लायनिस्टिक वर्ष २०२६-२७ करिता क्लबच्या अध्यक्षपदी लायन राजाराम अस्वरे, सचिवपदी लायन व्यंकट चेलापथी तर खजिनदारपदी लायन नरेंद्र महाजनी यांची अधिकृत नियुक्ती करण्यात आली आहे.
शनिवार, दिनांक १३ जून २०२६ रोजी आयोजित करण्यात आलेल्या या दिमाखदार सोहळ्यात पदग्रहण अधिकारी लायन नरेंद्र डोईफोडे यांनी नवनियुक्त अध्यक्ष आणि इतर सर्व नूतन पदाधिकारी यांना त्यांच्या पदाची व गोपनीयतेची शपथ दिली.
या कार्यक्रमाला प्रमुख पाहुणे म्हणून लायन सलीम शिकलगर आणि देहूरोड पोलीस स्टेशनचे सहाय्यक पोलीस निरीक्षक (API) सावनकुमार वाघमारे उपस्थित होते. प्रमुख पाहुण्यांच्या हस्ते लायन्स क्लब स्कूल आणि कॉलेजमधील SSC (इयत्ता १० वी) आणि HSC (इयत्ता १२ वी) परीक्षेतील गुणवंत (Topper) विद्यार्थ्यांचा विशेष सत्कार करण्यात आला.
कार्यक्रमाचे सूत्रसंचलन सौ. स्मिता गायकवाड यांनी केले. लायन्स क्लब कॉलेजचे प्राचार्य श्री. कैलास काळापहाड यांच्या मार्गदर्शनाखाली कॉलेजच्या शिक्षक आणि शिक्षकेतर कर्मचाऱ्यांनी या संपूर्ण कार्यक्रमाचे उत्तम नियोजन व व्यवस्थापन केले. या सोहळ्याला परिसरातील नागरिक आणि क्लबचे सदस्य मोठ्या संख्येने उपस्थित होते.
